ਅਜਾਦੀ - ਧਰਮ ਪ੍ਰਵਾਨਾਂ
ਅਜਾਦੀ ਕੀ ਹੈ
ਇਸ ਦਾ ਮੈਂਨੂੰ ਨਹੀ ਪਤਾ,
ਕਿਉਕਿ ,
ਅਸੀ ਗੁਲਾਮ ਪੈਂਦਾ ਹੋਏ ,
ਗੁਲਾਮ ਹੀ ਮਰ ਜਾਣਾ ਹੈ।
ਮੇਰੀ ਮਾਂ ਨੇ ਸਾਨੂੰ ਪਾਲਣ ਲਈ,
ਖੇਤਾਂ ਵਿੱਚੋ ਛੱਟੇ ਚੁਗੇ,
ਨਰਮੇ ਚੁਗੇ,
ਪਿਉ ਨੇ ਸਖ਼ਤ ਮਜ਼ਦੂਰੀ ਕੀਤੀ।
ਮੈ ਸੁਣਦਾ ਹੁੰਦਾ ਸੀ,
ਆਪਣੇ ਮਾਂ ਪਿਓ ਦੀ ਜ਼ੁਬਾਨੋਂ
ਆਪਣੀ ਤਾਂ ਬੀਤ ਗਈ,
ਪਰ ਬੱਚੇ ਗ਼ੁਲਾਮ ਨਾ ਬਣਨ
ਬੜੀ ਮੁਸ਼ੱਕਤ ਨਾਲ
ਸਾਰੇ ਭੈਣ ਭਰਾਵਾਂ ਨੂੰ ਪੜ੍ਹਾਇਆ
ਪਰ,ਭ੍ਰਿਸਟ ਲੋਕਤੰਤਰ ਵਿੱਚ
ਨੌਕਰੀ ਕੋਈ ਮਿਲ ਨਾ ਸਕੀ ।
ਡਿਗਰੀ ਲੈ ਕੇ ਵੀ
ਸ਼ਾਹੂਕਾਰਾਂ ਦਾ ਨੌਕਰ,
ਚੰਦ ਰੁਪਈਆਂ ਲਈ
ਵਿੱਤੋਂ ਵੱਧ ਜਾਨ ਤੋੜ ਕੰਮ
ਕਰਨ ਕਰਕੇ,
ਸਰੀਰ ਜਵਾਨੀ ਵਿੱਚ ਹੀ
ਬੁਢਾਪੇ ਦੀਆਂ ਨਿਸ਼ਾਨੀਆਂ ਦੇਣ ਲੱਗਾ।
ਅੱਤ ਮੰਹਿਗਾਈ ਕਾਰਨ
ਚੰਗੀ ਖੁਰਾਕ ਨਸੀਬ ਨਾ ਹੋਈ।
ਸਾਰੀ ਉਮਰ ਤੁੱਛ ਜਿਹੀ ਤਨਖਾਹ ਲੈ
ਨਾਂ ਚਾਹੁੰਦਿਆਂ ਵੀ ਗੁਲਾਮਾਂ ਵਾਂਗ
ਸਾਰੀ ਉਮਰ ਗੁਜਾਰ ਲਈ,
ਅਜਾਦੀ ਭਾਲਦਿਆਂ ਭਾਲਦਿਆਂ
ਤਿੰਨ ਪੀੜ੍ਹੀਆਂ ਬੀਤ ਗਈਆ
ਪਰ, ਸਾਨੂੰ ਅਜਾਦੀ ਨਹੀ ਮਿਲੀ।
ਪਰ, ਸਾਨੂੰ ਇਤਿਹਾਸ ਵਿੱਚ
ਇਹ ਪੜ੍ਹਾਇਆ ਗਿਆ ਸੀ
ਕਿ, ਅੰਗਰੇਜ਼ਾਂ ਨੇ ਸਾਨੂੰ
ਸੋ ਸਾਲ ਗੁਲਾਮ ਬਣਾ ਕੇ ਰੱਖਿਆ ਸੀ।
ਪਰ, ਮੈ ਸੋਚਦਾ ਹਾਂ ਕਿ,
ਅਸੀ ਤਾ ਹੁਣ ਵੀ ਗੁਲਾਮ ਹਾਂ।
ਅਜਾਦੀ ਕਦੋ ਆਵੇਗੀ।
ਜਿਹਨੂੰ ਲੱਭਦੇ ਲੱਭਦੇ
ਸਾਡਾ ਦਾਦਾ,ਫਿਰ ਬਾਪ
ਇਸ ਜਹਾਨੋਂ ਕੂਚ ਕਰ ਗਏ
ਹੁਣ ਅਸੀ ਅਜਾਦੀ ਲੱਭਦਿਆਂ
ਰੁੱਖਸਤ ਹੋ ਜਾਣਾ ਹੈ।
ਕਿਰਤੀਆਂ ਨੂੰ ਅਜਾਦੀ ਨਸੀਬ
ਨਹੀ ਹੋਣੀ,
ਕਿਉਕਿ ਇਹ
ਅਜਾਦੀ ਧਨਾਢਾਂ
ਨੇ ਆਪਣੇ ਘਰ ਕੈਦ ਕਰ ਰੱਖੀ ਹੈ।
ਧਰਮ ਪ੍ਰਵਾਨਾਂ
ਕਿਲ੍ਹਾ ਨੌਂ ਫਰੀਦਕੋਟ
9876717686
23 ਮਾਰਚ ਭਗਤ ਸਿੰਘ ਦੀ ਸਹੀਦੀ ਤੇ ਵਿਸ਼ੇਸ਼ : ਧਰਮ ਪ੍ਰਵਾਨਾਂ
ਸਲਾਮ
ਭਗਤ ਸਿਓ ਤੈਨੂੰ ਸਲਾਮ ਹੈ,
ਤੇਰੇ ਸਾਥੀ ਸੁਖਦੇਵ,ਰਾਜਗੁਰੂ,
ਚੰਦਰ ਸ਼ੇਖਰ,ਮਦਨ ਲਾਲ ਢੀਗਰਾ,
ਗ਼ਦਰੀ ਬਾਬੇ,ਕੂਕੇ,ਬੱਬਰ ਅਕਾਲੀਆਂ
ਨੂੰ ਸਲਾਮ ਹੈ।
ਭਗਤ ਸਿਹੁੰ
ਤੁਹਾਡੀਆਂ ਕੁਰਬਾਨੀਆਂ ਨੂੰ ਸਲਾਮ ਹੈ
ਤੁਹਾਡੀਆਂ ਕੁਰਬਾਨੀਆਂ ਸਦਕਾ ਹੀ,
ਗਦਾਰ ਲੀਡਰਾਂ ਨੂੰ ਕੁਰਸੀਆਂ
ਨਸੀਬ ਹੋਈਆਂ ਸਨ।
ਅੱਜ ਤੇਰੇ ਅਤੇ ਤੇਰੇ ਸਾਥੀਆਂ ਦੀ
ਔਲਾਦ ਦਿਹਾੜੀਆਂ ਕਰ ਰਹੀ ਹੈ।
ਅੰਗਰੇਜ਼ਾਂ ਦੇ ਪਿੱਠੂ
ਰਾਜ ਕਰ ਰਹੇ ਹਨ
ਭਗਤ ਸਿੰਹਾਂ
ਤੇਰੇ ਸਮੇਂ ਜਿਹੜੇ ਗਦਾਰ ਸਨ
ਉਹ ਅੱਜ ਝੂਠੇ ਸਵਤੰਤਰਤਾ ਸੰਗਰਾਮੀਏ
ਬਣ ਮੋਜਾਂ ਲੁੱਟ ਰਹੈ ਨੇ
ਅਸਲ ਸਵਤੰਤਰਤਾ ਸੰਗਰਾਮੀਏ
ਸੜਕਾਂ ਤੇ ਰੋੜੀ ਕੁੱਟ ਰਹੇ ਨੇ।
ਭਗਤ ਸਿੰਹਾਂ,
ਦੱਸ ਤੈਨੂੰ ਕੀ ਮਿਲਿਆ ਫਾਂਸੀ ਦੇ ਫੰਦੇ ਤੇ ਚੜਕੇ,
ਤੂੰ ਵੀ ਆਪਣੇ ਸਾਥੀਆਂ ਨਾਲ ਮਿਲ
ਸ਼ਾਹੀ ਸਹੂਲਤਾਂ ਦਾ ਅਨੰਦ ਮਾਣ ਸਕਦਾ ਸੀ
ਭਗਤ ਸਿੰਹਾਂ ,
ਤੂੰ ਤਾਂ ਅਜ਼ਾਦ ਭਾਰਤ ਦੇ ਸੁਪਨੇ ਹੀ
ਬੁਣਦਾ ਰਿਹਾ,
ਤੇਰੇ ਸੁਪਨਿਆਂ ਦਾ ਰਾਜ
ਸੁਪਨਾ ਹੀ ਰਿਹਾ ਗਿਆ
ਗ਼ਰੀਬ ,ਮਜ਼ਦੂਰ,ਉਸ ਸਮੇਂ
ਗੋਰਿਆਂ ਦਾ ਗ਼ੁਲਾਮ ਸੀ
ਹੁਣ ਕਾਲਿਆਂ ਦਾ ਗ਼ੁਲਾਮ ਹੈ।
ਗੋਰਿਆਂ ਦੇ ਰਾਜ ਵਿੱਚ
ਭਾਰਤੀਆਂ ਨਾਲ ਅਨਿਆਂ
ਹੁੰਦਾ ਸੀ,
ਹੁਣ ਕਾਲਿਆਂ ਦੇ ਰਾਜ ਵਿੱਚ ਵੀ
ਅਨਿਆਂ ਹੋ ਰਿਹਾ ਹੈ।
ਕੋਈ ਫ਼ਰਕ ਨਹੀਂ
ਅਜ਼ਾਦ ਅਤੇ ਗੁਲਾਮ ਭਾਰਤ ਦੇ ਵਿੱਚ
ਧਰਮ ਪ੍ਰਵਾਨਾਂ
ਪਿੰਡ ਤੇ ਡਾਕ ਕਿਲ੍ਹਾ ਨੌਂ
ਫਰੀਦਕੋਟ 151203
9876717686
